Plantun de Prouvènço

Pèr coumpara dos planto d'encò nostre

Thymelaea sanamunda & Plumbago europaea

Thymelaea sanamunda

Thymelaeaceae

Noms en français : Passerine thymélée, Herbe du mont Serrat.

Descripcioun :
Aquelo trintanello, di fueio verdalo, trachis en mato dins li pelouso e relarg à jóuinis aubret sus cauquié tèndre. Se recounèis à si noumbróusi fueio en lanço longo de 10 à 15 mm que soun tout de long di cambo e mesclado emé li flour. Aquésti soun jauno e di quatre partido.

Usanço :
Avèn ges d'entresigne segur sus aquelo planto, pamens poudèn pensa, coume pèr lis àutri Thymelaeaceae, qu'es empouisounanto.

Port : Pichoto planto lignouso
Taio : 15 à 40 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Thymelaea
Famiho : Thymelaeaceae

Ordre : Malvales

Coulour de la flour : Jauno
Petalo : 4
Ø (o loungour) flour : 5 à 10 mm
Flourido : Printèms

Sòu : Ca
Autour basso e auto : 0 à 1200 m
Aparado : Noun
Abriéu à jun

Liò : Pelouso - Relarg à jóuinis aubret
Estànci : Termoumediterran à Subremediterran
Couroulougi : Estenoumediterrano-Nord-Ouèst
Ref. sc. : Thymelaea sanamunda All., 1785

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.